Integrimi i komuniteteve RAE i nevojshëm për realizmin e politikave

Mirel: Pjesëmarrja e romëve e nevojshme për të realizuar politikat.- Kuçi: Komuniteti RAE do të jenë qytetarë të barabartë në të gjitha fushat
Prishtinë, 11 maj 2011 (12.30)
Integrimi i komuniteteve romë, ashkali dhe egjiptas në jetën shoqërore dhe institucionale të vendit, vlerësohet të jetë i rëndësishëm në hartimin e politikës kosovare në përmbushjen e parakushteve themelore për integrim në Bashkimin Evropian.
Drejtori i Komisionit Evropian për Ballkanin Perëndimorë, Pierre Mirel dhe zëvendëskryeministri i Republikës së Kosovës, Hajredin Kuçi të mërkurën kanë zhvilluar një takim ku temë diskutimi ka qenë “BE-ja dhe integrimi i romëve, ashkalinjëve dhe egjiptasve në Kosovë”.
Drejtori i KE-së për Ballkanin Perëndimorë, Pierre Mirel ka theksuar se përpos integrimit të këtyre komuniteteve në fushën e edukimit, strehimit, kujdesit social dhe atij shëndetësor, element i rëndësishëm është edhe regjistri civil i tyre.
“Pjesëmarrja e romëve është e nevojshme për të bërë dhe realizuar politikat. Nuk janë vetëm institucionet shtetërore dhe komunat, por organizatat rome kanë një rol për të luajtur që nga fillimi nga projektimi deri në realizimin e politikave. Pesë temat që janë propozuar janë: regjistrimi civil, të gjithë mendojmë se është më i rëndësishmi, shkollimi, kujdesi shëndetësor, strehimi dhe jeta sociale-ekonomike”, ka vlerësuar Mirel.
Zëvendëskryeministri i Republikës së Kosovës, Hajredin Kuçi nga ana e tij ka thënë se integrimi i komuniteteve romë, ashkalinjë dhe egjiptas në shoqërinë kosovare përbën një nga parakushtet themelore në procesin e integrimeve evropiane.
“Me zotërinë Mirel kemi diskutuar edhe çështje të tjera që kanë të bëjnë me çështje të integrimeve, ndër pikat e vizitës së tij ka qenë organizimi i një seminari për të drejtat e ashkalinjëve, romëve dhe egjiptasëve në Kosovë, prezantimin e punëve që ka bërë Qeveria e Kosovës në këtë drejtim, por mbi të gjitha prezantimi i objektivave që kemi për të ardhmen, në veçanti për mënyrën e integrimit të tyre si qytetarë të barabartë në fushën e edukimit, por edhe në fushat tjera, në mënyrë që ata të ndihen mirë, të integrohen dhe të jetë një problem në kuptimin jo vetëm të trajtimit të barabartë etnik, por edhe një problem i përmbushur në raport me integrimet evropiane”, ka thënë zëvendëskryeministri Hajredin Kuçi.
Ndër të tjera, Kuçi ka bërë të ditur se një delegacion i Qeverisë së Kosovës javën e ardhshme do të zhvilloj takim me një delegacion të lartë të Komisionit Evropian, ku temë diskutimi do të jenë procesi i liberalizmit dhe marrëdhëniet kontraktoale Kosovë – BE.
Duke folur për vizitën e paralajmëruar për nesër të shefit të delegacionit serb në bisedimet me Prishtinën, Borislav Stefanoviç, Kuçi ka thënë se brenda ditës pritet të përfundojnë procedurat e vlerësimit të kërkesës së tij, e cila është bërë përmes përfaqësuesit të BE-së në Kosovë./kosovapress/