Bashkëpunimi i nevojshëm për cilësi në arsimin e lartë

Presidentja e Republikës së Kosovës, Atifete Jahjaga takoi të
martën menaxhmentin e Universitetit të Prishtinës, kryesuar nga rektori
Mujë Rugova. Në këtë takim thuhet se u diskutua edhe për
programet e ndryshme në fushën e arsimit të lartë, në të cilat
Universiteti i Prishtinës gëzon bashkëpunimin bilateral dhe qëllimi i të
cilave është ngritja e cilësisë, shkëmbimi i përvojave dhe i njohurive
akademike, specializimi i studentëve dhe i stafit akademik në fusha të
ndryshme, krijimi i urave miqësore dhe shkëmbimi ndërkulturor
mbarëbotëror.
Presidentja e Republikës së Kosovës, Atifete Jahjaga, shprehu
përkrahjen gjithëpërfshirëse të saj dhe të stafit bashkëpunues, duke e
konsideruar këtë bashkëpunim të nevojshëm për vazhdimin e ngritjes së
cilësisë së arsimit të lartë në Kosovë.
Presidentja pohoi se bashkëpunimi i ndërsjellë mes të gjitha
institucioneve të Republikës së Kosovës është më se i rëndësishëm dhe i
domosdoshëm për avancimin e kapitalit njerëzor dhe për promovimin e
vlerave akademike dhe profesionale në mbarë botën. /Telegrafi/