Tri marrëveshje bashkëpunimi me Malin e Zi

Ministri i Punëve të Jashtme i Republikës së Kosovës, Enver Hoxhaj, gjatë vizitës në Mal të Zi ka nënshkruar tri marrëveshje ndërshtetërore bashkëpunimi me ministrin e Punëve të Jashtme dhe të Integrimeve Evropiane të Republikës së Malit të Zi, Milan Rocen.

Hoxhaj dhe Rocen kanë nënshkruar Marrëveshjen për ripranimin e personave që janë pa leje qëndrimi, Marrëveshjen për regjistrimin e mëvonshëm të personave të zhvendosur nga Kosova me qëndrim në Mal të Zi, në regjistrat themeltarë dhe në regjistrin e shtetasve të Republikës së Kosovës si dhe Marrëveshjen për ripranimin e personave, hyrja dhe qëndrimi i të cilëve është joligjor.

Nënshkrimi i këtyre marrëveshjeve është konsideruar një hap drejt përmbushjes së kritereve integruese evropiane dhe tregues i faktit se dy shtetet tashmë janë të gatshme për përmbylljen e procedurave integruese në Bashkimin Evropian.

Ndryshe, Hoxhaj, do të udhëtojë në Lituani, ku do t’i bashkëngjitet presidentes së Republikës së Kosovës, Atifete Jahjaga, e cila po qëndron në një vizitë zyrtare në këtë shtet.

Gjatë qëndrimit në Lituani, do të zhvillojë takime të shumta me ministra të Punëve të Jashtme të Evropës dhe shteteve që ende nuk e kanë njohur pavarësinë e Kosovës. /Telegrafi/