PKK merr nën kontroll kufirin me Malin e Zi

Policia Kufitare e Kosovës ka marrë përgjegjësinë për kontrollimin e kufirit edhe me Malin e Zi me një gjatësi prej 79 kilometrash.

RTV21 njofton se të shtunën në kampin italian, Villaggio, të KFOR-it në Pejë, është organizuar ceremonia zyrtare e dorëzim-pranimit të kompetencave nga KFOR-i te Policia Kufitare e Kosovës për kontrollin e vijës kufitare me Malin e Zi. Marrëveshja është nënshkruar nga komandanti i KFOR-it, Erhard Buehler, ministri i Punëve të Brendshme i Kosovës, Bajram Rexhepi, ministri i Punëve të Brendshme i Malit të Zi, Ivan Brajovic dhe shefi i EULEX-it, Xavier Bout de Marnhac.

“Në gjithë këtë proces të bartjes së kompetencave dhe menaxhimit me sukses të vijës kufitare së pari me Shqipërinë, duke vazhduar me Maqedoninë dhe sot me Malin e Zi, ne jemi rritur profesionalisht dhe jemi të përkushtuar që të marrim përsipër edhe kilometrat e fundit të kufirit, pra ato me Serbinë, posa të krijohen kushtet edhe me atë pjesë të vendit”, ka thënë ministri Rexhepi.

Policia Kufitare e Kosovës kohë më parë ka marrë kompetencat për ruajtjen e kufirit edhe me Shqipërinë dhe Maqedoninë. /Telegrafi/