Arsimimi i komuniteteve i garantuar me Kushtetutë

Kryekuvendari Jakup Krasniqi u takua të martën me komisarin e lartë për pakica kombëtare të OSBE-së, Ambasadorin Knut Vollebaek. Me këtë rast, Krasniqi u tha se arsimimi i komuniteteve pakicë është i garantuar me Kushtetutë.

Kryetari i Kuvendit të Republikës së Kosovës, Jakup Krasniqi, tha se sa i përket kornizës ligjore dhe përdorimit të gjuhëve të komuniteteve pakicë, legjislacioni është ndërtuar në mbështetje të Pakos së Ahtisaarit për mbrojtjen e komuniteteve pakicë dhe përdorimin e gjuhëve në Kosovë.

Sa i përket bisedimeve me Serbinë, Krasniqi tha “Jemi për atë që të kaluarën ta lëmë prapa, duke u angazhuar drejt perspektivës në të mirën e dy popujve dhe të dy shteteve, Kosovës dhe Serbisë”.

Ndërkaq, ambasadori Knut Vollebaek shfaqi interesim për disa çështje që kanë të bëjnë me pakicat, siç është arsimimi i tyre, kornizën ligjore për përdorimin e gjuhëve, pjesëmarrjen politike të pakicave në reformën zgjedhore, trashëgiminë kulturore, si dhe procesin e bisedimeve ndërmjet Kosovës dhe Serbisë.

Gjatë takimit u bë fjalë edhe për trashëgiminë kulturore. Ruajtjes së kësaj trashëgimie, tha kreu i legjislativit të vendit i kushtohet kujdes i duhur. /Telegrafi/