Krenarë me 2 Korrikun 1990

2 Korriku i vitit 1990 shënoi shkëputjen institucionale mes
Kosovës dhe Serbisë. Zëvendëskryeministri, njëherësh edhe ministror i
Drejtësisë i Republikës së Kosovës, Hajredin Kuçi, me rastin e 2
Korrikut, Ditës së shpalljes së Deklaratës Kushtetuese, në emër të
kryeministrit Hashim Thaçi dhe të Qeverisë së Kosovës, ka pritur të
shtunën delegatët e Kuvendit të Kosovës të legjislativit të vitit 1990.Zëvendëskryeministri
Kuçi ka thënë se 2 Korriku 1990 – Dita e shpalljes së Deklaratës
Kushtetuese është shembulli më i mirë se si institucionet e një vendi
reflektojnë vullnetin e qytetarëve të tij. Sipas tij 2 Korriku ka
rëndësi jo vetëm në kuptimin historik dhe kombëtar, por në kuptimin
politik, demokratik dhe juridik për Kosovën.
“Qeveria e Kosovës, unë dhe gjithë qytetarët e Republikës ndihen
krenar me atë ditë dhe ju protagonistët e asaj ngjarje që ka rëndësi për
ngjarjet që ndodhën më pas”, theksoi Kuçi duke shtuar se data e 2
Korrikut është shembulli më i mirë se si institucionet e një vendi
reflektojnë vullnetin e qytetarëve. 2 Korriku shënon shkëputjen
institucionale me Serbinë. Natyrisht se kjo nuk ka qenë një gjë e lehtë
dhe ky është akti më i lartë demokratik deri në atë kohë”.
“Sot 21 vite pas nga kjo ngjarje ju duhet të ndjeheni krenar . Kosova
ka nevojë ende për juve, për kontributin tuaj për ndërtimin e vendit.
Qeveria e Republikës së Kosovës gjithmonë do të jetë mirënjohëse për
njerëzit, për individët dhe ngjarjet që kanë bërë protagonizmin e kësaj
historie”, pohoi Kuçi.
Në emër të delegatëve të Kuvendit të Kosovës të vitit 1990, ka
falënderuar Iliaz Ramajli. Me këtë rast, zëvendëskryeministri të
pranishmëve u ka dhuruar nga një ekzemplar “Libri i Ditës së
Pavarësisë”. /Telegrafi/