Kujdes! Mbishkrimi nuk garanton mbrojtje nga dielli

Preparatet e shtrenjta për rrezitje nuk ofrojnë mbrojtje më kualitative, ndërsa këtë nuk e bën as blerja tyre në barnatore. Ekspertët
kanë testuar 16 preparate për mbrojtje nga dielli me faktorë mesatarë
mbrojtës, kryesisht të firmave të njohura, çmimet e të cilave lëviznin
nga 0.99 e deri në 40.79 euro për 100 mililitra.
Ata u kanë kushtuar vëmendje edhe pohimeve të produkteve, siç janë
“dermatologjikisht i testuar”, “antialergjik”, “nuk është testuar në
shtazë” dhe të ngjashme.
Rezultatet nuk ishin edhe aq të mira duke u bazuar në emrat e
kompanive me nam botëror. Disa prej tyre kishin dështuar në rezistencën
ndaj ujit edhe pse këtë aftësi e kanë të shkruar në ambalazh.
Kur bëhet fjalë për udhëzimet e përdorimit të produkteve, dobët janë
vlerësuar shumica e tyre. Në fakt edhe pse kanë mjaft informata, ato
janë të shkruara në ambalazhin e kartonit ose në letrën përcjellëse, të
cilën zakonisht përdoruesit e hedhin dhe nuk e marrin me vete në plazh.
Rekomandohet që të gjitha preparatet për rrezitje të kenë qartë të
përshkruar mbrojtjen e tyre nga rrezet UVA dhe UVB, si dhe numri i
faktorit mbrojtës (SPF) duhet të mos rritet ose zvogëlohet, por të jetë
ai i vërteti që e ofron produkti, në mënyrë që të sigurohet mbrojtje sa
më kualitative.
Autorët e këtij studimi thonë se nuk është lehtë që të zgjedhësh
preparatet mbrojtëse kur e di se nuk je i sigurt nëse ato do të
sigurojnë mbrojtjen që ofrojnë, përkundër parave që paguan. Për këtë
arsye, sipas tyre, është më mirë që të shmanget dielli sidomos në
periudhën e rrezikshme të ditës (10:00-16:00), në mënyrë që të mos
rrezikohemi nga sëmundjet e rënda të lëkurës. /Telegrafi/