Hagi "kopjon" Kuzhen: Cana në mbrojtje

Stamboll, 19 janar - Mesfushori i Kombëtares së Shqipërisë, Lorik Cana, do të jetë për një kohë të shkurtër qendërmbrojtës i skuadrës turke Galatasaray, shkroi të martën e përditshmja "Hurriyet".
Cana 27-vjeçar në miqësoren me skuadrën e Ajaxit që përfundoi pa gola është aktivizuar në rolin e qendërmbrojtësit dhe ka impresionuar trajnerin rumun Gheorghe Hagi. Sipas gazetës turke, Cana në stërvitjet e ditëve të fundit po punon së bashku me qendërmbrojtësin Gokhan Zan, pasi trajneri rumun është i bindur se këta dy kuptohen mirë mes vete.
"Cana nuk e ka për detyrë të luajë në mbrojtje, por përkohësisht do të kryejë rolin e qendërmbrojtësit derisa Hagi të gjejë një zgjidhje për këtë rol", shkruan gazeta turke. "Hagi po kërkon lojtarë me përvojë në mbrojtje dhe tashmë ka biseduar me Canën duke i bërë me dije do të luajë në mbrojtje së bashku me Gokhanin. Ai ka thënë se ka besim të madh në këta dy futbollistë, pasi i llogarit si lojtarët më të mirë defansivë në skuadër".
Për mesfushorin kosovar, roli i qendërmbrojtësit nuk është diçka e re, pasi ai këtë detyrë tash e sa kohë e kryen edhe te Kombëtarja e Shqipërisë, e në periudha të shkurtra këtë e kreu edhe te klubet e mëparshme Olympique Marseille dhe Sunderland.
Seleksionuesi i Shqipërisë, Josip Kuzhe, më herët pati deklaruar se roli i Canës në Kombëtare është i definuar dhe kjo "s'bën" të diskutohet.
Cana deri më tani ka zhvilluar 46 ndeshje me Kombëtaren shqiptare dhe ka shënuar një gol.
Cana te Galatasaray u transferua para fillimit të këtij edicioni nga skuadra e Sunderlandit për një dëmshpërblim prej 4.5 milionë eurosh. Me skuadrën turke ka firmosur kontratë deri në vitin 2014. Këtë edicion ka regjistruar 13 ndeshje në Superligën e Turqisë. Fillimisht, pati probleme me trajnerin Frank Rijkaard e më pas edhe me lëndime.