James Berisha ka pritur më shumë ndihmë nga Qeveria

Piloti nga Kosova me shtetësi amerikane, James Berisha, ka thënë se shpresonte më tepër ndihmë nga qeveria e Kosovës për misionin e tij të fluturimit në Afrikë që synon të sigurojë më tepër njohje për pavarësinë e Kosovës.

Në një intervistë për Zërin e Amerikës, ai është shprehur se ka pasur një ndihmë minimale, që për të është skandaloze, ndërsa ia hedh fajin mentalitetit me të cilin zyrtarët i shohin nismat e tilla.

“Ka qenë mirë që ata të jenë me misionin gjatë gjithë kohës, një gjë që nuk e kanë bërë... Ndihma është simbolike, një ndihmë minimale, 20.000 euro, ky mision kushton afër gjysmë milioni... Kur Qeveria jonë shpenzon 5.7 milionë euro për një gjë që unë ende nuk di se çfarë kemi përfituar nga ajo gjë për t’i bërë publicitet Kosovës, e neve na jep vetëm 20.000 euro, ky është nja skandal i madh”, është shprehur Berisha.

Sipas pilotit, misioni i tij në pothuajse të gjitha vendet afrikane i ka siguruar Kosovës miliona dollarë të ardhura, pasi ka shërbyer si një reklamë për vendin e tij, me intervistat dhe takimet që ai vetë ka zhvilluar në secilin vend.

Berisha është kthyer në Shtetet e Bashkuara pas një aksidenti të rëndë në Sudan, ku bëri një ulje të detyruar në një rrugë pranë shkretëtirës. Me gjithë këto vështirësi, ai thotë se do ta vazhdojë misionin e tij në Afrikë. /Telegrafi/