Franca mirëpret marrëveshjet Kosovë-Serbi

Ministria e Punëve të Jashtme dhe Evropiane e Francës i ka mirëpritur marrëveshjet ndërmjet Serbisë dhe Kosovës, ndërsa u bëri thirrje palëve për të siguruar zbatimin e shpejtë të këtyre marrëveshjeve.

“Franca mirëpret marrëveshjet e para të arritura në mes të Beogradit dhe Prishtinës, më 2 korrik, në kuadër të procesit të dialogut të lehtësuar nga Unioni Evropian. Këto marrëveshje do të mundësojnë lëvizjen e lirë të shtetasve të të dy shteteve, që nuk ekzistonte deri më sot. Do t'i mundësojnë poashtu Kosovës të ketë një regjistër të saktë të gjendjes civile, falë misionit evropian EULEX. Të dërguarit serbë dhe kosovarë kanë gjetur një marrëveshje, në parim, për njohjen reciproke të diplomave të lëshuara nga të dyja shtetet”, thuhet në komunikatë.

Këto zhvillime vlerësohen pozitive dhe inkurajuese.

“Ato kontribuojnë në përmirësimin e jetës së përditshme të banorëve të dy shteteve. Ato përfaqësojnë një hap drejt pajtimit ndërmjet Serbisë dhe Kosovës, që është i domosdoshëm për afrimin evropian të këtyre dy shteteve, të cilin Franca e mbështet.
U bëjmë thirrje palëve për të siguruar zbatimin e shpejtë të këtyre marrëveshjeve dhe të vazhdojnë procesin e dialogut në mënyrë që përparimet tjera të ndodhin në ditët e ardhshme”, thuhet në njoftim. /Telegrafi/