Suspendohet nga puna z/komandant i Policisë në Mitrovicë

Është suspenduar nga puna në Policinë e Kosovës, z/komandanti
rajonal i policisë në Mitrovicë, n/kolonel Ergin Medic, kanë njoftuar
burime të gazetës “Koha Ditore” brenda në polici, me kusht të
anonimitetit. Sipas burimeve, Medic është suspenduar ditë më
parë nga puna, ndërsa zyrtarë të policisë në Mitrovicë as nuk kanë
mohuar, as nuk kanë pohuar shkarkimin e tij.
Burimi më tej ka precizuar se Medic është suspenduar nga puna për 2
muaj, me pagesë. Dyshohet se ai ka keqpërdorur veturën zyrtare dhe nuk
ka respektuar orarin e punës. Gjithashtu shkak për suspendimin e
nënkolonelit Medic është përfshirja e tij në një incident me një person
të gjinisë femërore në Hotelin ‘Palac’, në Mitrovicë.
Lidhur me te gjitha këto, përgjegjësi për informim në policinë e
Kosovës në Mitrovicë, Avni Zahiti, përmes telefonit as nuk ka mohuar, e
as nuk ka pohuar suspendimin e zëvendës komandantit rajonal të policisë
së Kosovës në Mitrovicë. /Telegrafi/