Ditët e këqija të EULEX-it

EULEX-i ka qenë në situatë të vështirë ditëve të fundit. Përveç
që është injoruar tërësisht nga Qeveria e Kosovës, misioni i Bashkimit
Evropian ka qenë plotësisht i çorganizuar dhe ka vepruar si në mjegull,
që nga dita kur nisi aksioni i Policisë së Kosovës për vendosjen e
masave të kontrollit në veri. I kanë munguar edhe
informacionet e nevojshme për situata krizash, ndërsa as KFOR-i nuk
është treguar miqësor me të, shkruan gazeta Express.

Pasi EULEX kishte refuzuar të zbatojë vendimin për masat e
reciprocitetit në pikat kufitare veriore, sipas kërkesës së Qeverisë,
kryeministri Hashim Thaçi kishte urdhëruar aksionin e forcave të rendit.
Që nga ai moment, për EULEX-in kishin nisur çastet e vështira.

Burime ndërkombëtare i kanë thënë gazetës se, për shkak të mungesës
totale të informacioneve zyrtare se çfarë po ndodhte në veri, zyrtarëve
më të lartë të EULEX-it iu kishte mbetur të informohen vetëm nga mediat.
Madje, as KFOR-i nuk ushte treguar miqësor për dhënie informatash.

Shefi i EULEX-it, Xavier Bout de Marnhac ishte në pushim, ndërkaq
zyrtarë tjerë të lartë të misionit nuk po arrinin fare të kontaktonin as
me kryeministrin, as me ndonjë zyrtarë të lartë. “Thjesht, ata nuk ua
hapnin telefonin”, tha për gazetën një burim nga Qeveria.

Problemet në komunikimin e EULEX-it me institucionet e Kosovës i
konfirmojnë edhe zyrtarët e këtij misioni. Shefi i Zyrës për informim të
EULEX-it, Nicholas Hawton, ka thënë se deri para dy ditësh, kontaktet e
tyre me institucionet vendore ishin të limituara.

Ndërkaq, këshilltari kryesor i kryeministrit, Bekim Çollaku në një
intervistë për Express ka thënë se qasja e EULEX-it duhet të ndryshojë
menjëherë. “EULEX nuk mund që të përdorë forcën enorme policore për
bastisjen e një lokacioni në qendër në qendër të Prishtinës, ndërsa ta
lë në mëshirën e bandave kriminale pikën 1 dhe 31. Unë jam i sigurt se
EULEX do të nxjerrë shumë mësime nga ndodhitë e fundit”, është shprehur
ai. /Telegrafi/