Mafia i Leposaviqit aleat me Ivanovicin

Slobodan Simonovic (1974), nga Leposaviqi, në dokumentin konfidencial të NATO-s përshkruhet si një prej personave më të njohur për veprimtari mafioze dhe me lidhje të ngushtë me politikanët serbë në veri të Kosovës dhe udhëheqësit e MUP-it serb.

Para luftës në Kosovë ai ishte i kërkuar dhe më pas ishte burgosur me dhjetë vjet burg për shkak të trafikimit të parave të falsifikuara dhe të armëve. Por, ishte liruar më pas nga Vucina Janicijevici, kreu i MUP-it serb në Mitrovicë. Nga aty, ata kishin farkuar mes vete bashkëpunimin dhe shoqërinë.

Portali “LajmeShqip.com” shkruan se në lirimin e tij ka ndikuar edhe gjykatësi në Gjykatën e Kralevës, Miroslav Ivanovic, që është vëlla i njërit prej përfaqësuesve të serbëve të veriut të Kosovës, Oliver Ivanovic.

Simonovic është udhëheqës i një bande me 12 anëtarë me bazë në Leposaviq, me të cilën kryen aktivitetet mafioze. Kurse, lidhjet me sigurimin serbë i ka vendosur qysh në kohën e Milosevicit, për t’i thelluar më pas edhe pas ardhjes së Vojislav Kostunicës në pushtet. Anëtarë të partisë së Kostunicës kanë qenë të përfshirë në aktivitete kriminale në veri dhe
dokumenti i NATO-s e përshkruan Simonovicin si mbështetës radikal të Oliver Ivanovicit. Lidhja e tij me Ivanovicin bazohet në mbulimin dhe fshehjen e së kaluarës kriminale dhe përfshirjes së tyre në shumë skandale të papublikuara. Për ta mbajtur fshehtë këtë të kaluar, ata e kanë përkrahur njëri-tjetrin.

Në pjesën tjetër të veprimtarisë së tij, Simonovic përshkruhet si i përfshirë në shumë trazira të pasluftës në veri të Kosovës. Ai ka ushtruar presion të vazhdueshëm ndaj pjesëtarëve serbë të Policisë së Kosovës, ndërsa ka sulmuar fizikisht oficerin e SHPK-së, Milutin Savic duke i kërkuar atij që t’ia drejtojë armët UNMIK-ut. Ai ka pasur probleme edhe me KFOR-in në veri, sa që njëherë i kishte sulmuar disa ushtarë që t’i shtypë me makinë.

I konsideruar si mafia i madh i Leposavicit, Simonovic është arrestuar disa herë nga policia e UNMIK-ut gjë që ka shkaktuar protesta të serbëve në veri dhe ndërhyrjen e politikanëve serbë të veriut për ta liruar. /Telegrafi/