Koalicioni s’është tronditur

Zëvendëskryeministri Hajredin Kuçi ka hedhur poshtë deklaratë se “lufta për të marrë meritat për njohjet e fundit të pavarësisë së Kosovës”, ka lëkundur koalicioni qeverisës mes PDK-së dhe AKR-së.

“Koalicioni lidhet mbi bazën e parimeve dhe jo mbi bazën e perceptimeve personale. Ka mundur të ketë keqkuptime, por jo sa ta tronditin koalicionin”, ka thënë Kuçi, njofton REL.

Kosova është njohur së fundi nga katër shtete, ndërsa meritat për këto njohje janë munduar t’i marrin si zëvendëskryeministri Behxhet Pacolli, ashtu edhe ministri i jashtëm Enver Hoxhaj. Kjo ka bërë që mediat të raportojnë për lëkundje të koalicionit.

“Unë e di që mund të ketë keqkuptime në raste të caktuara. Unë besoj që qeveria e Kosovës, populli i Kosovës po i gëzon ato njohje dhe partnerët tanë ndërkombëtarë dhe secili prej nesh duhet të ndjehet mirë. Në kuadër të kësaj, detyrat që i kemi, përgjegjësitë që i kemi mund të na japin më shumë ose me pak merita, por merita i takon qytetarit”, ka thënë zëvendëskryeministri Kuçi. /Telegrafi/