Krasniqi: Mendoni për kombin e jo për privatizime

Kryetari i Parlamentit të Kosovës, Jakup Krasniqi, duke i komentuar idetë për ndarje të Kosovës ka thënë se Beogradi dhe Bashkësia ndërkombëtare duhet ta dinë se nuk mund të ndryshohen vetëm kufijtë e Kosovës.

Në një intervistë për “Epoka e Re”, në pyetjen se cila do të duhej të ishte kundërpërgjigja e Kosovës në rast se Beogradi insiston në ndarje, Krasniqi ka thënë politika në Kosovë duhet të konfirmojë se nuk mund të ndryshohen vetëm kufijtë e Kosovës.

“Konsideroj se është koha që politika shqiptare në përgjithësi të mendoj më shumë për kombin dhe të ardhmen e tij sesa për gurthyes dhe privatizime me grupet mafioze ndërkombëtare. Të punojë për ndërprerjen e politikave që tokat shqiptare të Ilirisë antike të përdoren si monedha kusuritje për interesat e politikave grabitqare e shoviniste të ndonjë shteti edhe në Ballkanin e sotëm”, ka thënë Krasniqi.

Sipas tij, në Kosovë nuk mund të ketë as status special për Veriun, pos zbatim të planit të Ahtisaarit.

“Nga mosrealizimi i këtij dokumenti askush nuk humb më shumë se komuniteti serb në Kosovë”, ka thënë Krasniqi. “Në cilin vend të botës 5 për qind e komunitetit ka gjuhën e vet gjuhë zyrtare? E mos t’i përmendin kompetencat që kanë në arsim, shëndetësi, siguri etj.”!

Duke komentuar veprimin e 25 korrikut të qeverisë së Kosovës në veri, Krasniqi ka thënë se ky aksion “i përgatitur ose jo, i planifikuar ose jo, i koordinuar ose jo si duhet, ka prodhuar situatë të re e cila duhet të përcillet me shumë vëmendje”, sepse “e bëri unifikimin e faktorëve politikë shqiptarë të fliste me një zë”.

“Kjo askund nuk u pa më mirë sesa në kuvendin e Republikës së Kosovës ku populli foli nëpërmjet përfaqësuesve të tij të zgjedhur, por me interes u përcoll nga të gjitha shtresat e shoqërisë sonë”. /Telegrafi/