Miqtë e presidentes

Presidentja Atifete Jahjaga nuk ndodhet në Vlorë vetëm për pushime. Ajo po punon për krijimin e frupit “Miqtë e Kosovës”, ku do të përfshihen ish-diplomatë ndërkombëtarë. Ata do të angazhohen për përmirësimin e imazhit të Kosovës dhe për njohje të reja. Ministria e Punëve të Jashtme dhe Behgjet Pacolli nuk dinë gjë për këtë nismë.

Burime të gazetës “Express” kanë thënë se Presidentja do të diskutojë për këtë çështje të martën dhe të mërkurën në Vlorë. Për konkretizimin e kësaj ideje, atë do ta ndihmojnë edhe përfaqësues të shoqërisë civile. Sipas burimeve, atje ka udhëtuar edhe Luan Shllaku nga Fondacioni i Kosovës për Shoqëri të Hapur (KFOS), për të cilin thuhet se i pari më 2008 ka lansuar idenë për krijimin e grupit të miqve ndërkombëtarë.

Dy këshilltarë të Presidentes Jahjaga, Ilir Deda dhe Qëndrim Gashi, të kontaktuar nga “Express”, nuk kanë pranuar të flasin për këtë temë, por megjithëkëtë asnjëri nga ta nuk e ka mohuar këtë informatë.

Burime të gazetës kanë folur me kusht anonimiteti për funksionalizimin e grupit të miqve të Kosovës.

“Kjo ide po bëhet tani për t’u përfshirë edhe ajo në procesin e lobimit, por në një mënyrë tjetër, nëpërmjet anëtarëve të këtij grupi që do të formohet”, ka thënë burimi.

Zyrtarë të MPJ-së dhe të Zyrës së zëvendëskryeministrit Pacolli kanë thënë se nuk janë të njoftuar nga Presidenca për themelimin e grupit. Por, ata kanë theksuar se Presidentja ka kontribuar në strategjinë e MPJ-së për njohje të Kosovës dhe se nuk presin që të ketë ndonjë strategji tjetër.

Opinioni tri herë është njoftuar nga Presidenca se Jahjaga ka në plan të mbledh në një grup ish-diplomatë ndërkombëtarë që në mënyra të ndryshme ishin të përfshirë në çështjen e Kosovës. Atëherë nuk është thënë se grupi “Miqtë e Kosovës” do të lobojnë për çështje të njohjes, por për përmirësimin e imazhit të shtetit. /Telegrafi/