Stojanovic Beogradit: Mos po e doni Thaçin për ministër?

Kryetari i Komunës së Graçanicës, Bojan Stojanovic ka akuzuar lidershipin dhe institucionet në Serbi për qasje jokonstruktive ndaj serbëve në Kosovë. Për gazetën “Vesti” të Beogradit, ai tha se Serbia po e shfrytëzon Kosovën për konsum politik, ndërsa investimet në Kosovë i bën në adresë të gabuar, kryesisht tek njerëzit që nuk jetojnë në Kosovë.

Ai vlerësoi se serbët e Kosovës e shohin Beogradin si nënë të tyre dhe pa të nuk mund të ekzistojnë. Megjithatë, Stojanovici paralajmëroi se sjellja e pushtetit në Serbi nuk do të sjellë asgjë të mirë, për faktin se “ata paguajnë pa kontroll njerëzit (serbë kosovarë) që nuk jetojnë në Kosovë...”.

Sipas tij, nuk mund të jetë tradhtar i popullit të vet një person, i cili punëson njerëz, ndërton rrugë, ndihmon agrobiznesin, hap shkollë tenisi, ku stërviten 160 fëmijë, shkollë futbolli, që merr pjesë në turnetë ndërkombëtare, teatër, laborator etj.

Problemi i serbëve në Kosovë mund të zgjidhen vetëm me një politikë serioze shtetërore, tha ai. “Duhet të ekzistojë strategjia dhe synimi i qartë që do të arrihej në Kosovë. Paramendoni sikur shqiptarët të heqin dorë nga pavarësia dhe të kemi zgjedhje të reja parlamentare në Serbi, pra Kosova, Presheva, Bujanoci, Medvegja, më shumë se 1.5 milionë vota. Dhe si do të dukej atëherë parlamenti i Serbisë dhe qeveria? Hashim Thaçi - ministër i Punëve të Jashtme”, transmeton Zëri intervistën e publikuar në Vesti. /Telegrafi/