Serbia duhet të largohet nga veriu i Kosovës

Ministri i Punëve të Jashtme i Republikës së Kosovës, Enver Hoxhaj ka pritur të enjten në takim Ambasadorin e Republikës Federale të Gjermanisë në Kosovë, Ernst Reichel. Në këtë takim, ambasadori Reichel ka informuar ministrin Hoxhaj me qëndrimin e Qeverisë gjermane lidhur me zhvillimet në veri të Kosovës.

“Kancelarja Angela Merkel të mërkurën në Beograd ka kërkuar nga Qeveria e Serbisë që ta pranojë realitetin në Kosovë dhe të heq dorë nga strukturat paralele në veri dhe që të mundësojë shtrirjen e aktivitetit të EULEX-it në tërë territorin e Kosovës”, ka thënë ambasadori Reichel, duke informuar ministrin Hoxhaj për qëndrimin zyrtar të Qeverisë gjermane.

Sipas ambasadorit Reichel, qëndrimi gjerman lidhur me veriun e Kosovës, i thënë edhe nga Kancelarja Merkel në Beograd do të jetë i vazhdueshëm, deri në arritjen e synimeve për tërheqjen e strukturave paralele në veri të Kosovës dhe shtrirjen e aktiviteteve të EULEX-it.

Reichel ka thënë se shteti gjerman kërkon nga Qeveria e Kosovës që të jetë e përkushtuar në dialogun në mes Kosovës dhe Serbisë në gjetjen e zgjidhjeve që do të përmirësojnë jetën e qytetarëve.

Nga ana tjetër, ministri Hoxhaj ka thënë se në asnjë vend të Evropës, nuk ka shtete që mundohen të kontrollojnë territore të shteteve tjera. “Prandaj mesazhi i shtetit gjerman është i qartë, që kjo praktikë duhet të përfundojë”, ka thënë Hoxhaj, në këtë takim.

“Gjermania gjithmonë ka pas qëndrime konsistente për paqen dhe stabilitetin në Kosovë dhe rajon. Qëndrimet e Kancelares Merkel dhe shtetit gjerman janë po ato të popullit dhe shtetit të Kosovës. Shpërbërja e strukturave ilegale paralele në veri të Kosovës do të mundësoj paqe dhe bashkëjetesë. Prandaj, stabilizimi i gjendjes në veri, duhet të bëhet përmes implementimit të Pakos së Ahtisaarit dhe Kushtetutës së Republikës së Kosovës”. /Telegrafi/