Djukanovic: Serbia duhet ta njohë Kosovën

Ish-kryeministri i Mali të Zi, Milo Djukanovic, ka thënë se
njëra nga çështjet e hapura në rajon janë raportet mes Serbisë dhe
Kosovës, të cilat duhet doemos të zgjidhen. Sipas tij, zgjidhja nuk
qëndron te presioni ndaj Beogradit për njohjen e pavarësisë së Kosovës,
dhe se vetëm njohja nuk do të zgjidhte gjithçka, porse të dyja vendet
duhet t’i kryejnë detyrat e shtëpisë që do t’i kualifikonin për të
ardhmen euroatlantike.Në një intervistë për Dnevnik,
ai ka thënë se është e domosdoshme të sigurohet bashkëjetesë mes
Kosovës dhe Serbisë, pasi që gjendja aktuale në të cilën po tentohet të
mbahet hapur statusi i Kosovës, i dëmton të dyja palët. Kështu- thotë
ai- Serbia humb hapin në integrimet evropiane, ndërsa Kosova pengohet në
ndërtimin e institucioneve, zhvillimin e demokracisë, punësimin dhe
zhvillimin ekonomik, mbrojtjen e të drejtave të pakicave, kthimin e të
zhvendosurve, si dhe ruajtjen e trashëgimisë kulturore dhe fetare.
Sa i përket ideve për ndarjen e Kosovës, Djukanovic ka deklaruar se
Mali i Zi do të pranonte çfarëdo zgjidhje për të cilën do të pajtoheshin
të dyja palët, mirëpo, sipas kryetarit të Partisë Demokratike të
Socialistëve, idetë për kufij etnikë u kanë kushtuar shumë popujve të
Ballkanit në të kaluarën.
Djukanovic mendon se Serbia duke pranuar realitetin duhet ta njohë
pavarësinë e Kosovës, ashtu që më pas të dyja shtetet t’i kthehen punës
për të ardhmen dhe integrimet euroatlantike. Kreu i PDS ka vlerësuar se
ekziston një problem i madh në bashkëpunimin rajonal dhe kjo ndodh për
shkak të mungesës së komunikimit mes Beogradit dhe Prishtinës.
/Telegrafi/