Egjiptit i kërkohet ta njohë Kosovën

Vizita e ministrit të Punëve të Jashtme të Republikës së Kosovës, Enver Hoxhaj, në Egjipt, është përcjellë me interesim të madh nga mediat e shkruara dhe elektronike të këtij shteti.

Gazetat egjiptiane kanë përcjellë vizitat dhe takimet e shumta të ministrit Hoxhaj me personalitetet politike dhe përfaqësuesit e shoqërisë civile dhe bashkësive fetare në Kajro, si dhe kanë botuar editoriale, opinione dhe reportazhe të ndryshme, e përbashkëta e të cilave ishte apeli i medieve egjiptiane që ky shtet ta njohë sa më parë shtetin e pavarur dhe sovran të Kosovës.

“Ministri i Jashtëm i Kosovës, Enver Hoxhaj, ka arritur në Kajro, në vizitën e parë të një zyrtari kosovar që nga shpallja e pavarësisë në vitin 2008. Hoxhaj, ka nisur vizitën e tij treditore, me vizitën në Sheshin Tahrir. Hoxhaj tha se Sheshi Tahrir tani është bërë vlerë e gjithë botës, dhe jo vetëm e arabëve. Ai tha se ky shesh përfaqëson lirinë dhe luftën, duke shtuar se liria dhe lufta që e ka bërë populli egjiptian në këtë shesh, ka frymëzuar popullin e Kosovës dhe gjithë botën me mënyrën e protestave paqësore e civilizuese, si dhe këmbënguljen për të arritur të drejtat dhe liritë e veta”, thuhej në njërën prej gazetave egjiptiane, ku shpalosej agjenda e Hoxhajt gjatë vizitës në këtë shtet.

Një gazetë tjetër e Kajros në shkrimin e saj thotë se ministri i Jashtëm i Kosovës në konferencën e organizuar nga Sindikata e Gazetarëve të Egjiptit me titull “Pavarësia e Kosovës”, ka thënë se qëllimi i vizitës në Egjipt është njohja e pavarësisë së Kosovës nga Egjipti. Ai ka falënderuar mikpritjen e Egjiptit, e veçanërisht njohjen e shtetit të tij nga të Rinjtë e Revolucionit.

“Stabiliteti politik në Kosovë ka ndihmuar zhvillimin e lartë ekonomik. Hoxhaj ka kërkuar nga Egjipti i ri që të ndjekë politikë të re ndaj Kosovës, dhe kjo politikë duhet të jetë njohja e pavarësisë. Por, vendimi i njohjes është vendim sovran që i takon Egjiptit e jo Kosovës, dhe ka shprehur interesimin për bashkëpunim në fushën ekonomike, turizmit e shkëmbimit kulturor. Hoxhaj ka shtuar se ndryshimi në shoqërinë egjiptiane ka qenë i domosdoshëm, por kjo duhet të ndodhë edhe në të gjitha shtetet arabe”, thuhej në artikull.

Ndërkohë, është folur edhe për njohjen e Kosovës nga Partia al-Wafd, kryetari i të cilës, Sayyid al-Badawi, ka thënë se do të mbështesë njohjen përmes Aleancës Demokratike, pjesë e së cilës janë 35 parti, ndër të cilat edhe partia e tij.

Një tjetër gazetë prestigjioze ka shkruar për takimin e Hoxhajt me kryemyftiun e Egjiptit, Ali Gomaa, me ç’rast ka kërkuar nga qeveria egjiptiane që të njohë sa më shpejt shtetin e Kosovës. /Telegrafi/