Serbia s’do t’i njohë diplomat e Kosovës

Ministri për të Drejta të Njeriut dhe të Pakicave, Administratë Shtetërore dhe vetëqeverisje lokale, njëherësh kryetar i Trupit koordinues për jugun e Serbisë, Milan Markovic, ka deklaruar se Serbia nuk mund t’i njohë diplomat e studentëve nga Universiteti i Prishtinës, në të cilat ndodhet vula Republika e Kosovës.

“Ne jemi të hapur për marrëveshje. Të mos vëmë kurrfarë vule”, është shprehur Markovic para gazetarëve pas promovimit të Leksionit juridik serbisht-shqip.

Markovic u ka bërë thirrje autoriteteve të Prishtinës të “mos shfrytëzojnë të ardhmen e fëmijëve për qëllime politike”, citon FoNet këtë zyrtar të lartë të Serbisë, njofton Koha.

“Nuk ka kurrfarë mëdyshjes se nuk do t’i njohim diplomat me vulën e Kosovës, meqë ky është provokim dhe dëshirë që në mënyrë implicite ta njohim Kosovën”, ka deklaruar Markovic. Ai ka thënë se Serbia as në mënyrë implicite e as eksplicite nuk do të njohë pavarësinë e Kosovës.