Serbia t’i pranoj diplomat e universiteteve të Kosovës

Kryetari i Këshillit për të Drejtat e Njeriut (KDNJ) në Bujanoc, Belgzim Kamberi, ka kërkuar të enjten nga shteti serb dhe shefi i Trupit koordinues për Luginën e Preshevës, Milan Markovic, që të zgjidhet çështja e diplomave të Republikës së Kosovës.

Kamberi me këtë rast e ka akuzuar Markovicin se qëndron prapa hetimit që udhëhiqet ndaj tij, gjashtë muaj pas protestave të të rinjve në Preshevë, ku ishte kërkuar njohja e diplomave të universiteteve të Kosovës.

Në konferencë për shtyp, Kamberi tha se ajo protestë ishte e paraqitur në mënyrë të rregullt dhe se ka kaluar pa kurrfarë problemesh. “Problemi doli në pah më vonë, gjashtë muaj pas protestës, kur mua më morën në polici për shkak të një bilbordi në të cilin kishim ngjitur diplomën për Markovicin”, tha Kamberi, duke vlerësuar se Markovici është politikan, dhe se ata kanë pasur të drejtë ta kritikojnë. /Telegrafi/