Serbia heq maskat, do ndarjen e Kosovës

Shumica në Qeverinë e Serbisë konsideron se ndarja është zgjidhja e
vetme për problemin e Kosovës, citon gazeta e përditshme serbe “Blic”
një burim të afërt me koalicionin qeverisës.
“Është e vërtetë se në
mbledhjet zyrtare qeveria nuk flet për ndarjen, gjë që dje e ka
konfirmuar edhe kryeministri Mirko Cvetkoviq, por në kabinet dhe në
qarqet e ngushta kjo përmendet gjithsesi. Disa anëtarë të qeverisë i
pengon kushtetuta që ta thonë zëshëm mendimin e vet, ndërkaq shumica nuk
dëshiron të marrë përsipër rrezikun dhe të përmendë ndarjen si zgjidhje
të qëndrueshme, kryesisht për shkak të pasojave politike”, citon kjo
gazetë burimin e vet.
Në komunikim me diplomatët e huaj muaj me
radhë po shqyrtohet ky opsion, dhe po flitet për modelet që do të mund
të ishin të përdorshëm për rastin.
Përveç modelit të dy Gjermanive, i
cili në fakt nuk përfaqëson ndarjen, por bashkëjetesën territoriale,
bashkëbiseduesi i “Blicit” ka përmendur se po flitet edhe për modele të
tjera, dhe se shpesh përmendet modeli i Ishujve Alande.
Të sqarojmë
këtë model: Ishujt Alande janë pjesë e Finlandës dhe pjesa më e madhe e
popullatës është flasin suedisht. Ishujt Alande janë politikisht
neutrale dhe plotësisht të demilitarizuar. Në vitin 1921 këta ishuj kanë
marrë autonomi të zgjeruar nga Parlamenti i Finlandës.
Ndarja, si
një zgjidhje e mundshme e problemit të Kosovës deri para një muaji ishte
një temë tabu ndër zyrtarët serbë, por deklaratat gjithnjë e më të
shpeshta të politikanëve serbë, ndër ta edhe ato të presidentit Boris
Tadiq, se për të gjitha opsionet duhet të bisedohet, kanë hapur çështjen
nëse Serbia njëmend është e gatshme të ndryshojë politikën ndaj Kosovës
dhe që të mjaftohet që në përfundim të zgjidhjes të mos mbetet
duarthatë.
“Blic” shkruan se zyrtarisht kundër ndarjes së Kosovës
janë kryeministri Mirko Cvetkoviq, shefi i diplomacisë serbe, Vuk
Jeremiq, dhe shefi i ekipit për bisedime me Prishtinën, Borko
Stefanoviq.
Sidoqoftë Serbia tashmë ka hequr maskat dhe ka shfaqur ambiciet për ndarjen e Kosovës.