BE pengon Tadicin për ndarjen e Kosovës

Bashkimi Evropian është duke e penguar Beogradin që ta lansojë
edhe zyrtarisht kërkesën për ndarjen e Kosovës, bëjnë të ditur burime
nga qarqe ndërkombëtare në Prishtinë.Sipas tyre, presidenti
serb, Boris Tadic, e ka inkurajuar dhe më pas mirëpritur opsionin e
lansuar nga zëvendëskryeministri dhe ministri i brendshëm serb, Ivica
Dacic, për ndarjen e Kosovës dhe ka dëshiruar që të pozicionohet hapur
pro- këtij opsioni, por kishin qenë zyrtarë të lartë të Brukselit ata që
e kishin sugjeruar Tadicin që të heshtë, shkruan Zëri.
Megjithatë, Tadic nuk kishte heshtur dhe mesazhet e tij i adresoi në
një formë tjetër, duke u thënë medieve se idetë për ndarjen e Kosovës
nuk janë të reja dhe se ato kanë qarkulluar për një kohë shumë të gjatë.
Këto opsione serbe po lansohen me nxitim në kohën kur po vazhdojnë
bisedimet midis Kosovës dhe Serbisë, të cilësuara si dialog për çështje
teknike.
Madje, sipas të njëjtave burime, Tadic nuk i ka vlerësuar fare të
rëndësishme disa marrëveshje që po përfliten se do të mundë të
nënshkruhen gjatë këtij muaji, duke insistuar që të hapen temat
politike, sidomos ajo e veriut të Kosovës, për të cilin ai si opsion e
ka ndarjen e kësaj pjese nga Kosova dhe bashkimin me Serbinë.
/Telegrafi/