Serbia në BE vetëm pas njohjes së Kosovës

Ministri i Forcës së Sigurisë së Kosovës, Agim Çeku, ka
deklaruar se Serbia e ka pritur momentin që ta shes sa më shtrenjtë
ish-gjeneralin e saj, Ratko Mladic, me qëllim të shkurtimit të rrugës që
duhet ta përshkojë për tu integruar në Bashkimin Evropian. Por sipas
ministrit Çeku, anëtarësimi i Serbisë në Bashkimin Evropian do të ndodhë
vetëm pasi Beogradi ta njoh pavarësinë e Kosovës.“Mladic ka
qenë i mbrojtur nga strukturat mbrojtëse serbe dhe arrestimi i tij ka
mundur të ndodhë shumë kohë më përpara, mirëpo Qeveria serbe e ka pritur
momentin që ta shes sa më shtrenjtë. Sidoqoftë, arrestimi i Mladicit
është lajm i mirë për drejtësinë ndërkombëtare, por edhe për Serbin,
pasi ndoshta mund t’i shkurtohet rruga e integrimit në Bashkimin
Evropian”.
“Por sa më afër që Serbia do t’i afrohet bashkimit Evropian, aq më
shumë do të shtohet deklaratat që do t’ia kujtojnë asaj nevojën për
njohjen e shtetit të Kosovës. Në fund, do të vije koha kur Serbisë do
t’i thuhet qartë se kushti i vetëm që i ka mbetur të anëtarësohet në
Bashkimin Evropian, është njohja e Kosovës”, ka deklaruar Çeku, i cili
gjatë luftës ka qenë komandant i UÇK-së, më pas i TMK-së, e po ashtu
edhe kryeministër i Kosovës në vitin 2006-2008.
Lidhur me të ardhmen e Forcës së Sigurisë së Kosovës, ministri Çeku
ka deklaruar se kjo forcë edhe tani në esencë është ushtri e shtetit të
Kosovës. Ai ka thënë se përveç synimit që Kosova të bëhet anëtare e
Bashkimit Evropian, ajo do të jetë edhe anëtare e NATO-s. /Telegrafi/