Nigeria afër njohjes së Kosovës

Në kuadër të turneut të tij lobues në kontinentin e Afrikës, zëvendëskryministri i parë i Kosovës, Behgjet Pacolli, pas vizitës në Togo ka udhëtuar në Abuja të Nigerisë, ku ka zhvilluar një darkë të përbashkët me presidentin e këtij shteti, Goodluck Jonathan.
Në këtë takim, Pacolli e njohu në detaje presidentin Jonathan me historinë e Kosovës, me periudhën e pasluftës dhe me procesin demokratik të pavarësimit të vendit, thuhet në një njoftim të lëshuar për media nga kabineti i Pacollit.

“Mund të konkludohet se në bazë të atmosferës dhe rrjedhës së takimit... Nigeria, si një ndër shtetet më të fuqishme të kontinentit afrikan, në një periudhë të afërt do ta njohë Kosovën si shtet të pavarur dhe sovran”, thuhet në kumtesë.

Pacolli, gjatë tri raundeve të vizitave në kontinentin e Afrikës, ka vizituar 28 shtete. Aktualisht ai është duke vizituar shtetin e Beninit, ndërsa turneu i tij lobues do të vazhdojë me vizitat në Gabon dhe Kongo. /Telegrafi/