Javën e ardhshme Nigeria e njeh Kosovën

Zëvendëskryeministri Behgjet Pacolli e ka njoftuar kabinetin qeveritar për procesin e lobimit që ka zhvilluar në Afrikë gjatë këtyre javëve.

Ai është i bindur se Nigeria javën e ardhshme do ta zyrtarizojë njohjen e pavarësisë së Kosovës. Sipas Pacollit, presidenti Goodluck Jonathan tashmë ka dhënë urdhrin për shkrimin e notës verbale. Ndërsa, Mali dhe Gaboni janë dy shtetet e tjera të Afrikës që mund ta njohin shpejt Kosovën.

Pacolli ka përsëritur se Komuniteti i Shteteve të Karaibeve (CARICOM) do ta njohin Kosovën veç e veç. Nga zyra e Pacollit njoftohet se pikërisht këto ditë, Kosovën do ta njoh edhe një shtet tjetër i këtij komuniteti.

Kosova javën e kaluar ka marrë 4 njohje, duke e çuar në 81 numrin e shteteve që e njohin pavarësinë.


E plotësuar - Zyra e Behgjet Pacollit ka paralajmëruar se sot do ta prezantojnë njohjen e radhës për shtetin e Kosovës.

“Një shtet nga vendet e CARICOM-it e ka njohur pavarësinë e Kosovës. Gjatë ditës, njohja bëhet publike”, ka thënë për “Express” Jetlir Zymberaj, këshilltar i zëvendëskryeministrit Pacolli, duke mos dashur të tregojë për shtetin që do ta njohë sot pavarësinë e Kosovës.

Burime të “Express” thonë se njohja do të prezantohet nga zëvendëskryeministri Behgjet Pacolli, i cili mbrëmë është kthyer në Prishtinë, bashkë me një përfaqësues të Ministrisë së Punëve të Jashtme.



E plotësuar - Shtetin e Kosovës pritet sot ta njoh edhe një vend tjetër.

Burime brenda Qeverisë bëjnë të ditur se autoritetet për punë të Jashtme sot do të njoftojnë publikisht për njohjen e re të shtetit të Kosovës nga një vend tjetër. Zyrtarët qeveritar nuk treguan për “Qendra.info” se për cilin shtet bëhet fjalë, por thanë se kjo do të bëhet e ditur në konferencën e shtypit që do ta mbajnë sot.

Njohja e pritshme do të jetë e 82-ta me radhë dhe një shtytje e re në angazhimet diplomatike nga zyrtarët vendor, të Shqipërisë, të SHBA-së, Britanisë e shteteve të tjera mike për shtimin e njohjeve të Kosovës. /Telegrafi/