Serbia drejt njohjes së Kosovës

Zëvendësi i ish-presidentit finlandez, Marti Ahtisaari, në zyrën
e cila ndërmjetësonte negociatat për statusin, Albert Rohan, është i
kënaqur me dialogun aktual mes Kosovës dhe Serbisë. Ai shpreh bindjen që
Serbia po tregon shenjat e njohjes së shtetësisë së Kosovës, derisa ka
pranuar këtë dialog me përfaqësuesit e shtetit kosovar.“Fakti
që të dy palët kanë filluar të bisedojnë me njëra- tjetrën, kjo i bie
që ato po e njohin njëra-tjetrën”, i deklaroi gazetës Zëri, Albert
Rohan.
Një nga autorët e Pakos së Ahtisaarit, Rohan, shkon deri aty sa
vlerëson se nuk është parësore që të shkohet nen për nen të propozimit
të statusit, për atë nëse kosovarët duhet të pranojnë ose jo diçka gjatë
dialogut aktual me Serbinë.
“Para se të verifikohet nëse Pako e Ahtisaarit po shkelet, kosovarët
duhet që të verifikojnë nëse ato të cilat po dialogohen me Serbinë janë
në të mirë të shtetit të ri”, thotë ai.
Reagimi i Rohanit bëhet pak ditë pasi gazeta “Zëri” raportoi se
marrëveshja tashmë e arritur për kthimin vetëm të kopjeve të librave të
amzës nga Serbia shkel nenin 7 të aneksit VII të propozimit prej nga
buron shtetësia e Kosovës. Sipas këtij neni, Kosova duhet të marrë në
tërësi arkivin që është jashtë Kosovës e jo kopjet e saj.
Kryeministri i Kosovës, Hashim Thaçi, në muajin mars iu kishte thënë
deputetëve në parlamentin e Kosovës se “dialogu me Serbinë do bëhet duke
u mbështetur në Propozimin për Statusin”. Shefja e delegacionit
kosovar, Edita Tahiri, nuk e kishte hedhur poshtë shkeljen e pakos
Ahtisaari, por ka sqaruar se kjo është një masë e përkohshme derisa
Kosova e Serbia të ndërtojnë raporte ndërshtetërore.
Albert Rohan ka thënë se ai merr informata të rregullta nga
lidershipi kosovar se si po ecën dialogu aktual me Serbinë, ndërsa
shprehet i kënaqur me zbatimin e Pakos së Athisaarit, me përjashtim të
veriut të Kosovës.
“Jam jo pak i shqetësuar për atë që propozimi për statusin nuk ka
pasur deri më tash fare zbatim në atë pjesë të Kosovës”, tha në fund
Rohan. /Telegrafi/