Pikat 1 dhe 31 mund të diskutohen me 2 shtator?

Në raundin e ri të bisedimeve që do të mbahet më 2 shtator, krahas vulave doganore dhe tregtisë së lirë, nga palët mund kërkohet të bisedojnë edhe për pikat kufitare 1 dhe 31.

Dialogu mes Kosovës dhe Serbisë ka hyrë në fazën më kritike prej se ka filluar. Beogradit i është bërë e qartë nga Angela Merkel se duhet të shpërbëjë strukturat paralele në veri. Ndërsa, nga Prishtina mund të kërkohet që të bisedohet për pikat kufitare 1 dhe 31.

Burim Ramadani, nga AAK, thotë se Qeveria – me marrëveshjet e arritura me Beogradin - ka shkelur vijat e kuqe.

“Ne nuk po shohim garanci se Qeveria nuk do të diskutoje edhe çështjet e rregullimit të brendshëm, siç është çështja e doganave dhe pikave kufitare”, thotë Ramadani për “RTK”.

Analisti Belul Beqaj thotë se bashkësia ndërkombëtare dhe Serbia nuk kanë bërë veprime të cilat do të krijonin kushte për vazhdimin e dialogut.

“Në takimin e radhës nuk përjashtohet mundësia të arrihet një marrëveshje ku Serbia i humb 400 milionë euro në vit me mundësinë e anëtarësimit në BE. Por, realisht, mbeten shkaqet të cilat do ta destabilizojnë marrëveshjen dhe në afat më të gjerë e bëjnë atë të paqëndrueshëm”, thotë Beqaj.

Ilir Deda, këshilltar i Presidentes Jahjaga, ka thënë se vulat doganore dhe tregtia e lirë janë çelës për integrim evropian dhe pa u zgjidhur këto çështje nuk ka aspirata për t’u integruar në BE.

“Kjo duhet të zgjidhet në mënyrë që të hyjmë në një vizion evropian”, ka thënë Deda.

Ndërkaq, Visar Xani, nga zyra e zëvendëskryeministres Tahiri, ka thënë tha se nuk ka asgjë të re për të deklaruar për takimin që pritet të mbahet më 2 shtator.