Hoxhaj: Serbët duan konflikt të ngrirë

Ministri i Punëve të Jashtme i Republikës së Kosovës, Enver Hoxhaj, në një intervistë për të përditshmen franceze “Le Monde”, ka thënë se Policia e Kosovës nuk ka përdorur dhunë në veri. Sipas tij, janë strukturat paralele ilegale të sigurisë të shtetit serb, të cilët kanë përdorur eksploziv, armë automatike dhe snajperë, duke vrarë një polic në Kosovë.

“Edhe më tutje Serbia po i mbron këto struktura paramilitare. Në dymbëdhjetë vjet, Serbia ka shpenzuar 6 miliardë euro për të ruajtur kontrollin mbi pjesën veriore të Kosovës dhe për të ruajtur status-quon. Vetëm gjatë këtij viti i ka shpenzuar 260 milionë”, ka theksuar Hoxhaj.

Ai ka shtuar se nuk njeh asnjë vend tjetër në Evropë, që bënë përpjekje të ushtrojë kontroll administrativ mbi një pjesë të një shteti fqinjë.

“Kjo praktikë duhet të ndalet menjëherë. Serbët lokal janë mbajtur peng nga strukturat paramilitare. Beogradi duhet të lejojë serbët e veriut të integrohen në institucionet e Kosovës. Ne duam një integrim të vërtetë të serbëve, sikur në pjesët tjera të Kosovës, në përputhje me planin e Ahtisaarit”, ka shtuar ai.

Me këtë rast, Ministri Hoxhaj ka thënë se plani i Ahtisaarit u ofron serbëve lokalë të drejtat që asnjë minoritet në Evropë nuk i gëzon.

Duke folur për qëndrimet e zyrtarëve serbë për Kosovën, Ministri Hoxhaj ka thënë se Evropa duhet të jetë e shqetësuar lidhur me vizionin serb.

“Serbia duhet të kuptoj se fati i saj është brenda kufijve të saj e jo në Bosnjë dhe Kosovë. Që nga vdekja e Zoran Gjingjiqit, Serbia mbetet e njëjtë, e ngrirë. Politikanët serbë duke kërkuar konflikt të ngrirë në veri të Kosovës, nuk e kuptojnë se ata ngrijnë të gjithë vendin e tyre”. /Telegrafi/