Trashëgimtar i Thaçit - Veseli ose Hoxhaj?

Njeriu që fare pak i është ekspozuar publikut, Kadri Veseli, ose njeriu ndër më medialët në parti, Enver Hoxhaj, pritet ta zëvendësojë Hashim Thaçin në drejtimin e PDK-së, kur ai t’i rreket garës për majë të pushtetit. Të parin e do partia e të dytin ndërkombëtarët.

Burime të gazetës “Koha Ditore” kanë thënë se në mesin e zyrtarëve të vendeve evropiane, jashtë Kosovës, ka pasur të brengosur me lajmin për mundësinë e largimit të Hoxhajt pas riformatimit të Qeverisë të paralajmëruar për muajin shtator.

Këta zyrtarë perëndimorë, që kanë dashur të mbeten të paemërtuar, nuk kanë shprehur ndonjë preferencë për emrat e ministrave të tjerë të përmendur për largim – ministrin e Zhvillimit Ekonomik, Besim Beqajn, dhe atë të Arsimit, Ramë Buja – por kanë thënë se shpresojnë që në rastin e shefit të diplomacisë, Hoxhaj, kryeministri Thaçi të mos e marr një vendim të tillë.

Arsyet kryesore për përkrahjen e Hoxhajt nuk kanë të bëjnë me punën e tij prej ministri, por me pritjet nga një pjesë e ndërkombëtarëve që pikërisht ai të jetë pasardhës i Thaçit në krye të Partisë Demokratike të Kosovës, kur Thaçi të jetë larguar nga partia (gjë që do të mund të ndodhte mbase edhe në zgjedhjet e ardhshme presidenciale).

“Pasi të jenë sqaruar plotësisht dyshimet në lidhje me çështjet nga koha sa ai sa ai ishte ministër i Arsimit, Hoxhaj do të mund të merrte lidershipin e parisë në vend të Thaçit, i cili do të mund të largohet për post presidencial”, ka thënë burimi i “Koha Ditore”.

Burimi ka theksuar se Thaçi është i interesuar që ta vë Kadri Veselin, mikun e tij, cili pas lufte ka drejtuar SHIK-un.
“Ai gëzon mbështetje në parti dhe njerëzit kanë besim në të”, thotë burimi. “As me ndërkombëtarët nuk e ka problem”. /Telegrafi/