Qeveria: Sulmi ndaj Tahirit, akt politikisht i papërgjegjshëm

Qeveria e Republikës së Kosovës shpreh indinjatën dhe dënon fuqimisht manifestimin e dhunës dhe vandalizmit ndaj zëvendëskryeministres Edita Tahiri në Aeroportin Ndërkombëtar “Adem Jashari” të Prishtinës- thuhet në një deklaratë të Qeverisë.

“Sulmi, i cili është kryer nga individë të deklaruar si aktivistë të Lëvizjes politike Vetëvendosje, është një akt politikisht i papërgjegjshëm dhe në kundërshtim me ligjin. Ky akt është vandal dhe manifestim i huliganizmit për qëllim të përfitimit politik. Qeveria e Kosovës është e angazhuar në procesin e dialogut të barabartë me Serbinë, për zgjidhjen e të gjitha çështjeve që kanë të bëjnë me raportet në mes të dy shteteve. Kjo rrugë do të çojë në njohjen reciproke të dyja shteteve dhe në normalizimin e marrëdhënieve në rajon”, thuhet në deklaratë.

Më tej bëhet e ditur se Qeveria do të vazhdojë angazhimet e saja “për të konsoliduar shtetin e Kosovës, për mirëqenien e qytetarëve të vet dhe të forcojë partneritetin e vet me të gjitha strukturat ndërkombëtare në procesin e integrimeve euroatlantike”.

Qeveria e Kosovës ka kërkuar nga organet e sigurisë dhe drejtësisë që të gjitha aktet e dhunës dhe huliganizmit të trajtoje, pa marrë parasysh se nga cila anë vijnë.

“Sundimi i rendit dhe ligjit në Republikën e Kosovës nuk ka dhe nuk do të ketë alternativë. Ata që kundërshtojnë këtë, pavarësisht se nga vijnë, nuk do të kenë perspektivë në shtetin e lirë dhe demokratik të Kosovës”, përfundon deklarata. /Telegrafi/