Isa Mustafa nuk paraqitet në gjykatë

Kryetari i LDK-së dhe i Prishtinës, Isa Mustafa, as sot nuk u paraqit në Gjykatë, në një seancë dëgjimore ndaj tij, sipas padisë së ngritur nga Ukshin Mengjiqi.

Mengjigi, një ish pronar pompe benzine të rrënuar nga Komuna në afërsi të shkollës “Sami Frashëri”, e ka paditur kreun e Prishtinës për akuza për shpifje se pompa është ndërtuar me afera korruptive.

“Mustafa, duke ma rrëzuar pompën, ka deklaruar se ajo është ndërtuar me afera korruptive. Më ka shkaktuar dëme të mëdha në aspektin personal dhe biznesor”, tha Mengjiqi.

Siç raportoi KTV, avokati mbrojtës i Mengjiqit ka thënë se ka bazë të mjaftueshme që gjykata të vendosë për fajësinë e Mustafës.

Kreu i Prishtinës, ndërkohë, nëpërmjet një letre të deponuar, ka mohuar të gjitha akuzat, duke thënë se pompa ishte rrëzuar për shkak se paraqiste rrezik për sigurinë e njerëzve. /Telegrafi/