Partia e Ashkalijve paraqitet e vetme në zgjedhje

Prishtinë, 13 nëntor - Partia Demokratike e Ashkalijve të Kosovës (PDAK), bëri të ditur të shtunën se do të paraqitet e vetme në zgjedhjet e 12 dhjetorit, pa përjashtuar mundësinë e përafrimit, madje edhe të koalicionit, por vetëm pasi të shihen rezultatet e votimeve.

Ky qëndrim i PDAK-së vjen si rezultat i përqendrimit të kësaj partie për të mbrojtur në radhë të parë interesat e komunitetit ashkali, që llogaritet t’i ketë rreth 35 mijë pjesëtarë, të shpërndarë në disa komuna të Kosovës.

“Ne dëshirojmë të jemi vetë të zotët e shtëpisë sonë, të përfaqësojmë komunitetin tonë, pa mbetur në mëshirën e askujt, sepse më mirë se ne, askush nuk i di vuajtjet, të mirat dhe të këqijat e këtij komuniteti”, pohon Asllan Kryeziu, shef i shtabit zgjedhor të partisë që tubon ashkalijtë e Kosovës.

PDAK publikoi të shtunën edhe listën e 49 kandidatëve për deputetë të Kuvendit të Kosovës, që do të garojnë në zgjedhjet e sivjetme. Listës i prin deputeti nga përbërja e kaluar, Danush Ademi, kurse një e treta e kandidatëve janë femra, njoftoi KosovaLive.

Nga kandidatët e propozuar, tetë janë nga komuna e Ferizajt: Danush Ademi, Hafize Hajdini, Shkurte Hasani, Naser Emini, Behxhet Jashari, Behxhet Shabani, Hajrush Xhaferi dhe Avni Kopili.

PDAK tha se synon që bashkë me dy vendet e rezervuara, gjithsej t’i fitojë pesë ulëse në përbërjen e ardhshme të Kuvendit të Kosovës.