Pritet lirimi i pilotit Xhejms Berisha

Ministria e Punëve të Jashtme të Kosovës ka kërkuar nga Qeveria gjermane dhe ajo franceze që të ndikojnë tek Eritreja për lirimin e menjëhershëm të pilotit shqiptaro-amerikan Xhejms Berisha, i cili derisa ishte në mision lobues për njohjen e Kosovës është burgosur nga autoritetet e këtij shteti afrikan.
Artan Behrami, zëdhënës i MPJ-së, ka thënë përmes telefonit për Kosovapres se Gjermania dhe Franca kanë raporte të mira me shtetin e Eritresë dhe pritet që me ndikimin e tyre të arrihet lirimi i pilotit Berisha.
“Me qëllim që të lirohet sa më shpejt lobuesi shqiptaro-amerikan, Xhejms Berisha, ministri Enver Hoxhaj ka kërkuar nga Gjermania dhe Franca pasi që këto dy shtete kanë marrëdhënie të mirë me shtetin Eritrea, në mënyrë që me ndikimin e tyre të arrihet edhe lirimi i Xhejms Berishës”, ka thënë Behrami.
Ai, po ashtu, ka bërë të ditur se ministri Hoxhaj i ka dërguar një letër homologut të tij nga Eritrea, përmes së cilës sqaron misionin lobues të Xhejms Berishës për njohjen e pavarësisë, në mënyrë që prezenca e tij atje mos të keqkuptohet nga autoritetet e këtij vendi.
Behrami shtoi se nga informacionet e deritashme, mësohet se gjendja shëndetësore e Berishës është e mirë dhe se ai po trajtohet në mënyrë korrekte nga ana e autoriteteve të Eritreas dhe se shumë shpejt pritet lirimi i tij.
Piloti Xhejms Berisha kishte humbur kontaktin me familjen e tij më 15 gusht në kuadër të misionit “Flying for Kosovo”./kp/