Pahor si ndërmjetësues në mes të Thaçit dhe Tadicit

Me ftesë të kryeministrit slloven, Borut Pahor, kryeministri i Kosovës, Hashim Thaçi, ka filluar të premten pasdite një vizitë zyrtare në Republikën e Sllovenisë. Kryeministri Thaçi do të ketë takim me kryeministrin slloven, ndërsa temë bosht e takimit, thuhet se do të jetë thellimi i bashkëpunimit mes dy vendeve dhe perspektiva evropiane e Kosovës.

Por në fakt ky takim është paralajmëruar ditë më parë nga kryeministri slloven, pas takimit të tij me kancelaren gjermane, Angela Merkel dhe pritet që “Pahor të luaj rolin e ndërmjetësuesit mes kryeministrit të Kosovës dhe presidentit të Serbisë”.

Kryeministri i Sllovenisë gjatë takimit me kancelaren Merkel, javën e kaluar, kishte paralajmëruar se parashikon të takohet edhe me kryeministrin e Kosovës. Ai nuk kishte pranuar që të flas për detaje rreth këtij takimi, por sipas medieve serbe, kishte folur rreth “mundësisë së marrëveshjes mes Beogradit dhe Prishtinës”.

Sllovenia, kishte potencuar Pahor, në esencë ka pikëpamje identike me kancelaren gjermane për çështjen e Kosovës, edhe në “një mënyrë të menduar më detajisht se që atë e paraqiti Merkel në Beograd”. Ai atë ditë theksoi se kishte pasur “një bisedë shumë të rëndësishme” me presidentin serb, Boris Tadic, dhe e kishte paraqitur qasjen e tij për zgjidhjen e problemit të Kosovës, të cilin ka thënë se e ka prezantua në Berlin dhe Washington. /Telegrafi/
Komente