Mungesë barnash në treg

Përkundër kërkesave të vazhdueshme për barna, barnatoret vazhdojnë të mos kenë furnizim të mjaftueshëm.

Besnik Nura, farmacist, thotë se deri në 30 pacientë gjatë ditës dalin nga barnatorja që ai udhëheq pa i marrë ilaçet që u duhen.
“Për të ardhur barnat prej vendeve të rajonit, duhet një procedurë e regjistrimit të tyre. Është problemi më i madh mosregjistrimi i barnave që nuk kanë autorizim marketingu”, thotë ai për Radio Evropa e Lirë.

Ndërkaq, Ministri i Shëndetësisë, Ferid Agani, pranon se për arsyet e sipërpërmendura janë disa lloje të barnave që mungojnë.

“Ato barna mund të merren vetëm nëse merret një vendim i veçantë nga Qeveria”, thotë Agani.

Kadri Bytyqi, kryetar i Shoqatës së Farmacistëve, thotë se kanë hartuar lista me barnat të cilat nuk janë të regjistruara e që janë të nevojshme për tregun e Kosovës, si dhe për produktet që janë të regjistruara e që nuk janë prezentë në treg. Sipas tij, as kjo metodë nuk ka funksionuar.

“Pikërisht nga kjo listë është nisur dhe është përpiluar një listë e importit me leje të posaçme nga AKPM-ja, në bashkëpunim me Ministrinë e Shëndetësisë. Por, e meta e kësaj ka qenë se iu ka dhënë një kohë shumë e shkurtë importuesve dhe sasia ka qenë shumë e limituar. Këtë leje kanë pasur të drejtë të marrin vetëm një herë”, thotë ai.

Rekomandimi i shoqatës së farmacistëve, për Agjencinë Kosovare për Produkte Medicinale dhe Ministrinë e Shëndetësisë, për të dalë nga kjo situatë, ka qenë importi i barnave nga Shqipëria. Ndërsa ministri Agani thotë se me ndryshimet ligjore do të rregullohet edhe çështja e furnizimit me barna.

Deri në ndryshimet ligjore nga ana e zyrtarëve qeveritarë, pacientëve u mbetet të kërkojnë ilaçet që u duhen nëpër vendet e rajonit dhe më gjerë. /Telegrafi/