Në veri me doganierë vendorë e ndërkombëtarë

EULEX do të kryejë punët policore dhe doganore në portat 1 dhe 31, Jarinje dhe Bërnjak, në prezencë të doganierëve të Kosovës. Kjo do të bëhet në përputhje me mandatin ekzekutiv që ka misioni. Kështu thuhet në një komunikatë për media të misionit të Bashkimit Evropian në Kosovë.

Në fakt, kjo do të thotë që EULEX-i do të ndihmojë implementimin e marrëveshjes për vula doganore të arritur më 2 shtator në Bruksel, në kuadër të dialogut të ndërmjetësuar nga BE-ja.“Marrëveshja për vulat doganore ishte pjesa e fundit që mungonte për të lansuar një sistem të mirëfilltë doganorë, të cilin ne edhe e synojmë. Kosova, nën administrim të UNMIK-ut, që nga viti 2000 është bërë një zonë doganore, dhe është trajtuar nga BE-ja gjithmonë si e tillë”, thuhet në njoftim.

EULEX sqaron se marrëveshja ,e cila nuk ka asgjë të bëjë me statusin, është për të ndërmarrë një hap të madh përpara në sundimin e ligjit në Kosovë, e që është në interes të gjithë qytetarëve. “Mungesa e funksionimit të sistemit doganorë në të gjithë territorin e Kosovës ka lejuar që aktivitetet ilegale të zhvillohet lirshëm, veçanërisht por jo ekskluzivisht në veri të Kosovës. Tani do të kemi mundësi të merremi shumë më mirë me këtë çështje. Ky është një hap i rëndësishëm dhe të gjithë do jenë përfitues. Operacionet doganore në porta do të kryhen nga doganierët e EULEX-it, në prezencë të doganierëve të Kosovës”, thuhet më tej në njoftim.

Për më tepër, EULEX sqaron se pikëkalimi në Bërnjak do të jetë i hapur për trafik komercial dhe personal, si dhe për mallra komerciale dhe jo-komerciale. Importet e mallrave komerciale nëpërmjet pikës në Bërnjak duhet të zhdoganohen në Terminalin Doganorë në jug të Mitrovicës. “Deri sa të instalohet infrastruktura e duhur në Jarinjë, ky pikëkalim do të jetë i hapur vetëm për mallra jo-komerciale dhe trafik personal”, sqaron EULEX. Ndërkaq, të gjitha mallrat komerciale që i nënshtrohen akcizës, si alkooli, cigaret dhe karburantet, duhet të zhdoganohen nëpër pikëkalimin e Merdares ose në ndonjë pikë tjetër të autorizuar për trafik tregtar. /Telegrafi/