MASHT-SBASHK: Pritet harmonizimi i Kontratës së re kolektive

Ministri i Arsimit, Shkencës dhe Teknologjisë, Ramë Buja dhe kryetari i SBASHK-ut, Ali Shabnaj kanë biseduar të enjten për krijimin e komisioneve nga ana e MASHT-it dhe SBASHK-ut, të cilët do të punonin në harmonizimin e qëndrimeve rreth Draftit të Kontratës Kolektive të hartuar paraprakisht nga SBASHK-u.

Në njoftimin për media të MASHT-it thuhet se kontrata e re Kolektive do të hartohet në përputhje me Ligjin e Ri të Arsimit Parauniversitar dhe të dokumenteve tjera strategjike arsimore të miratuara ndërkohë nga Kuvendi i Republikës së Kosovës.

“Ne jemi të përkushtuar që të kemi dokumente të qëndrueshme, funksionale dhe të zbatueshme në praktikë, të krijojmë ambient të mirë për mësimdhënie dhe mësimnxënie– arsim cilësor”, tha Buja.

Ndërkaq, Shabanaj rikujtoi se ende nuk është kryer çështja e licencimit të arsimtarëve dhe shtoi se ky proces është mjaft i rëndësishëm.

Shabanaj, gjithashtu tha se duhet të ndërpritet laramania që ekziston në komuna të ndryshme të Kosovës lidhur me kontratat e përkohshme(1 vjeçare ) dhe kontratat e përhershme (5 vjeçare) të punës për arsimtarët.

Në këtë takim u fol edhe për vazhdimin e procesit të trajnimit të mësimdhënësve për programin ECDL. /Telegrafi/