Brukseli i brengosur

Një zyrtar i lartë i Bashkimit Evropian ka thënë se BE-ja është e brengosur për situatën në veri dhe moszbatimin e marrëveshjes për tregti të lirë. Ai tha se janë në kontakt të vazhdueshëm me Beogradin.

Një zyrtarë i lartë i BE-së ka thënë të enjten me kusht anonimiteti për Express se “Brukseli është në kontakt të vazhdueshëm me Beogradin”, por nuk pranoi të jap hollësi.

Kryediplomatja e BE-së, Catherine Ashton dhe as emisari i saj në dialogun mes Kosovës dhe Serbisë, Robert Cooper, nuk i kanë kthyer përgjigje Beogradit për propozimin që ka bërë për funksionimin dy pikave doganore në Veri.

Kryenegociatori serb Borko Stefanovic thotë se e ka vështirë të marrë pjesë në dialog nëse nuk përfshihet tema e doganave në Veri.

Duket se qëndrimin e Ashton do ta marrë presidenti Boris Tadic, i cili pritet të takohet në New York edhe me Sekretaren amerikane të Shtetit, Hillary Clinton.

Qeveria e Kosovës ka shfuqizuar vendimin për reciprocitet ndaj mallrave serbe, por Beogradi ende nuk lejon eksportin e mallrave kosovare në Serbi dhe as të kalojnë përmes territorit të saj, pavarësisht se e ka pranuar vulën doganore të Kosovës.

Zëdhënësja e Baroneshës Ashton ka thënë për Express se “dëshirojnë që embargoja të hiqet sa më shpejt që të jetë e mundshme”.

“EULEX është mision i BE-së dhe është duke vepruar plotësisht në përputhje me mandatin që ka. Ky është zbatim i marrëveshjes për vulat doganore”, ka thënë Maja Kocijancic, zëdhënëse e Ashton. /Telegrafi/