Konsultime për Kushtetutën në 11 qytete

Komisioni për amendamentimin e Kushtetutës së Republikës së Kosovës ka zhvilluar një takim konsultativ me kryetarët e Komunave të Kosovës, të cilët u informuan për ecurinë e procesit të amandamentimit të Kushtetutës dhe planet për organizimin e konsultimeve publike me qytetarë.

Kryetari i Komisioni, Arsim Bajami njoftoi se në bashkëpunim me koalicionin e OJQ-ve Demokracia në Veprim, do të organizohen konsultime publike në 11 qytete të vendit, duke përfshirë edhe komunat me shumicë serbe dhe turke.

Debatet do të zhvillohen në këto qytete: Prizren, Mamushë, Mitrovicë, Drenas, Podujevë, Gjakovë, Pejë, Ferizaj, Gjilan, Graçanicë, Prishtinë.

Konsultimeve publike do t’i paraprijë një fushatë sensibilizuese që do të zhvillohet në nivel qendror dhe lokal.

“Informimi dhe përfshirja aktive e qytetarëve në procesin e amandamentimit të Kushtetutës është e rëndësisë së veçantë për komisionin. Andaj, sot kërkuam nga kryetarët e Komunave që të na ndihmojnë në organizimin e konsultimeve publike, për të siguruar kështu pjesëmarrjen e qytetarëve dhe mbarëvajtjen e debateve”, theksoi Bajrami.

Ditë më parë, Komisioni miratoi me konsensus të plotë draft amendamentet Kushtetuese, të cilat me disa alternativa do t’i prezantohen qytetarëve gjatë konsultimeve publike.

Njëkohësisht, Komisioni është duke punuar edhe në hartimin e Ligjit për Zgjedhjen e Presidentit. Në përputhje me mandatin dhe planin e punës, Komisioni synon që në muajin janar të dorëzojë për shqyrtim dhe miratim në Kuvend, amendamentet Kushtetuese dhe Ligjin për Zgjedhjen e Presidentit. /Telegrafi/