Natë pa incidente në veri

Situata e sigurisë në veriun e Kosovës gjatë natës të së martës ka qenë e qetë dhe nuk është shënuar ndonjë incident, raportojnë zyrtarët e Policisë së Kosovës.

Besim Hoti, zëdhënës i kësaj policie për rajonin e Mitrovicës, i ka thënë Radios Evropa e Lirë se, përveç incidentit të djeshëm në vendkalimin kufitar në Jarinjë, nuk është shënuar ndonjë incident tjetër, gjatë orëve të fundit.

“Gjatë orëve të natës, tërësisht në zonën e përgjegjësisë të Drejtorisë rajonale të Policisë në Mitrovicë, nuk është regjistruar ndonjë incident madhor, i cili në çfarëdo lloj forme do të rrezikonte sigurinë e përgjithshme në vend, në përjashtim të incidenti në portën 1, të pikës kufitare në Jarinjë, me të cilin incident është përballur KFOR-i dhe EULEX-i dhe vazhdon të mbetet përgjegjësi e tyre për situatën e krijuar”, është shprehur ai.

Hoti ka shtuar se, pavarësisht situatës së qetë, është vërejtur atmosfera e tensionuar, e cila mbretëron në veri të vendit.

Situatën në veriun e Kosovës në përgjithësi si të qetë e ka përshkruar edhe Marko Jakshic, lider politik i serbëve të veriut të vendit.

Ai thotë se kjo situatë ka mbretëruar edhe në barrikadat pranë vendkalimeve kufitare, afër të cilave kanë qëndruar disa dhjetëra serbë lokalë.

“Nata ka kaluar e qetë edhe në barrikada e edhe përgjithësisht në qytet, ne veri të Mitrovicës. Nuk ka pasur probleme as në komunat tjera në veri të Kosovës”, tha Jakshq për Radion Evropa e Lirë.

Ai theksoi se nuk pret ndonjë përkeqësim të situatës, ndërkaq që serbët janë të vendosur në qëndrimin e tyre se doganierët dhe policia kufitare e Kosovës duhet të tërhiqen nga vendkalimet kufitare në Jarinjë dhe Bërnjakë. /Telegrafi/