Kryetari i Kaçanikut më i pasur se kryeministri Thaçi

Kaçanik, 5 qershor - Xhabir Zharku, kryetar i Komunës së Kaçanikut, është më i pasur se shefi i partisë së tij, Hashim Thaçi, njëherësh edhe kryeministër i Qeverisë së Kosovës, bazuar në deklarimin e pasurisë që këta dy zyrtarë të lartë e kanë bërë në Agjencinë Kosovare kundër Korrupsionit. Pasuria e Zharkut e kalon shumën prej 2 milionë eurosh. Në formularët që ia ka dorëzuar AKK-së, të publikuar ndërkohë, kreu i i Komunës dhe i Degës së PDK-së në Kaçanik thotë se është pronar i 50 për qind të aksioneve të ndërmarrjes prodhuese "X-FORT", me vlerë aktuale prej 1 milion e gjysmë euro. Ndërmarrja e sipërpërmendur prodhon llaçe dhe material fasadash, ndërsa gjendet në fshatin Doganaj të Kaçanikut. Ai është pronar edhe i truallit prej 33.77 hektarësh në lokalitetin "Dushkaja" në Kaçanik, i blerë në vitin 2000, me vlerë aktuale prej 300
mijë eurosh. I pari i Kaçanikut thotë se i tij është edhe trualli prej 6.24 hektarë në Durrës, i blerë më 1992, me vlerë 100 mijë euro, sikundër edhe i një sipërfaqeje tokësore dhe i një shtëpie në fshatin Biçec të Kaçanikut, të cilësuara si prona të trashëguara, me vlerë 90 mijë euro.
Zharku është pronar edhe i 2 shtëpive të tjera, një në Kaçanik e tjetra në Durrës. Shtëpinë në "Dushkajë" të Kaçanikut me 3,5 hektarë tokë, e ka përllogaritur të kushtojë 80 mijë euro, ndërsa atë në Durrës, e ndërtuar gjatë periudhës 2006-2008, 140 mijë euro. I pari i Kaçanikut vozit xhipin "WV Taureg", i blerë më 2007, që kushton 45 mijë euro. Nga mbledhja e shifrave të sipërpërmendura del se Xhabir Zharku ka prona të paluajtshme dhe të luajtshme në vlerë totale prej 2 milionë e 155 mijë euro. Ai nuk ka deklaruar para të gatshme të deponuara në institucionet financiare, ndërsa paga mujore neto e tij është 760 euro. Zharku thotë se merr edhe pagë në "X-FORT", sipas fitimit vjetor.
Pagë vjetore në shumë prej 2 400 eurosh nga "X-FORT" merr edhe gruaja e tij e punësuar aty. Ndërsa, njëri nga bijtë e kryetarit të Kaçanikut vozit xhip "Mitsubishi", i deklaruar si dhuratë e xhaxhait të tij me qëndrim në Suedi.