Maradona nuk zgjedh mjete për të motivuar lojtarët

Johannesburg, 7 qershor - Seleksionuesi i Argjentinës, Diego Armando Maradona, ka gjetur motivimin për futbollistët para Kampionatit Botëror "Afrika e Jugut 2010". Maradona u ka thënë futbollistëve së mbarë bota është kundër tyre, pasi të gjithë duan që Argjentina të eliminohet, shkruan të dielën "Daily Mirror".

Sipas gazetës angleze, seleksionuesi argjentinas kur ka mbetur vetëm pak ditë para fillimit të Botërorit është treguar shumë paranoik në fjalimin e tij.

"Madje edhe në Argjentinë ka të tillë që duan eliminimin. Nuk duhet t'i besojmë askujt jashtë ekipit. Bota ka dashur dështimin tonë kur ishim edhe organizatorë në vitin 1978. Kanë festuar humbjen e Argjentinës katër vjet më vonë, ndërsa kur fituam titullin e botës këtë e arritëm pasi luftuam kundër të gjithëve", citon "Mirror" fjalët e Maradonës drejtuar futbollistëve të tij. "Në Itali më 1990 bota festoi pas humbjes tonë në finale nga Gjermania. Kështu e keni kur luani për Argjentinën dhe askush nuk ua do të mirën. Madje ju kujtohet edhe në eliminatore na sulmonin për të dështuar. Për këtë arsye duhet të tregohemi të fortë, ndërsa veten e kemi shokun më të mirë në Afrikën e Jugut".

Përfaqësuesja e Argjentinës asnjëherë nuk ka pasur përvojë të mirë në Botërore kur bëhet fjalë për dopingun. Në stërvitjen e ditës së diel, doping-kontrolli ka vizituar ekipin e Argjentinës, ndërsa kanë marrë mostrat nga Diego Milito, Carlos Tevez, Sergio Aguero dhe Maxi Rodriguez.

Argjentina ndeshjen e parë e luan kundër Nigerisë (12 qershor) në kuadër të Grupit B, në të cilin janë edhe Greqia e Koreja e Jugut.