Ban: Çështja e veriut, vetëm me mjete paqësore

Sekretari i Përgjithshëm i Kombeve të Bashkuara, Ban Ki-moon, në raportin e rregullt për Kosovën fton të gjitha palët që të përmbahen nga hapat e njëanshëm, të cilët mund të rrezikojnë përparimin e arritur në dialogun Kosovë-Serbi.

Situata e përgjithshme e sigurisë në veri të Kosovës në periudhën prej 16 prillit deri më 15 korrik, e cila përfshihet në raport, ka qenë kryesisht e qetë, por tensionet janë ngritur kah fundi i kësaj periudhe, thuhet në raportin, i cili do të prezantohet në seancën e Këshillit të Sigurimit të KB-ve, ditën e hënë.

“Në veri të Kosovës, tensionet mbeten arsye për shqetësim. Në këtë aspekt, edhe më tej theksoj fuqishëm se çështja e ndjeshme lidhur me veriun e Kosovës mund të zgjidhet vetëm përmes mjeteve paqësore në bazë të konsultimeve me të gjitha komunitetet në terren dhe pa veprime të njëanshme”, thuhet në raport, transmeton “RTK”.

Për më tepër, Ban Ki-moon fton të gjitha palët që të përmbahen nga aksionet, të cilat mund të dëmtojnë përparimin e arritur në dialog.

Sekretari i përgjithshëm i KB-së ka shprehur kënaqësinë që në periudhën e përfshirë dialogu është intensifikuar dhe ka sjellë rezultate konkrete.

“Përshëndes marrëveshjet e arritura në fushën e lirisë së lëvizjes, librave amzë dhe diplomave akademike, dhe kërkoj nga Beogradi dhe Prishtina që plotësisht të angazhohen për zbatimin e tyre”, theksohet në raport.

Ai ka falënderuar edhe Lamberto Zannieri, mandati i të cilit ka skaduar më 1 korrik, ndërsa thekson se prioritet i UNMIK-ut mbetet përparimi në aspektin e sigurisë, stabiliteti dhe respektimi i të drejtave të njeriut në Kosovë dhe rajon. /Telegrafi/