Dorëzohet në Kushtetuese “çështja e PTK-së”

Dorëzohet në Kushtetuese “çështja e PTK-së”

Deputeti i LDD-së, Gani Geci e ka dorëzuar në Gjykatën Kushtetuese kërkesën për interpretimin e kushtetutshmërisë së mënyrës së votimit të Strategjisë së privatizimit të PTK-së.
Geci është i bindur se gjatë votimit të Strategjisë për privatizim të PTK-së është shkelur Kushtetuta dhe Rregullorja e Punës së Kuvendit, njofton Koha. Ani pse LDK-ja kishte bërë më së shumti zhurmë për ta hequr nga rendi i ditës në Kuvend strategjinë e shumëpërfolur, asnjë deputet i LDK-së nuk e ka vënë firmën në kërkesën e Gecit drejtuar Kushtetueses.

Sipas nenit 113 të Kushtetutës së Kosovës, në të cilin flitet për jurisdiksionin dhe palët e autorizuara për të shtruar kërkesë në Gjykatën Kushtetuese, në pikën 5 të saj thuhet: dhjetë a më shumë deputetë, brenda 8 ditësh nga dita e miratimit, kanë të drejtë të kontestojnë kushtetutshmërinë e çfarëdo ligji, ose vendimi të miratuar nga Kuvendi, si për përmbajtjen, ashtu edhe për procedurën e ndjekur.