Renault në Moskë paraqet automjetin luksoz Latitude

Në panairin e automjeteve në Moskë në fund të muajit gusht Renault do të na paraqes limuzinën Latitude.
I ndërtuar në platformën e Lagunas së zgjatur, Latitude ka 4.89 metra gjatësi, 1.83 metra gjerësi dhe 1.49 metra lartësi që nënkupton se nga modeli i ngjashëm Laguna ai është 195 milimetra më i gjatë, 19 mm më i gjerë dhe 45 më i lartë. Në platformën e njëjtë partneri i Renaultit, Samsung, ndërton limuzinën SM5 e cila, sipas fotografive, nga Latitude dallon vetëm nga pamja e rrjetit të ftohësit.

Tani për tani Renault nuk jep detaje teknike, mirëpo mbetet të pritet që Latitude do të motorizohet me linjën e njëjtë të motorëve me benzinë dhe naftë si në Laguna.

Sa i përket luksozitetit tek Latitude ai do të manifestohet me pajisje shtesë në formë të pajisjes trizonale të aklimatizimit, ulëseve të mbuluara me lëkurë dhe funksion masazhi, audio sistem Bose Premium, etj.
Pas premierës në Moskë këtë automjet do të mund ta shohim edhe në panairin e Parisit, derisa shitja e tij do të duhej të fillojë gjatë vjeshtës në Afrikë, Azi, Turqi, Australi e Meksikë, e diç më vonë edhe në mbarë Evropën.