Gjykimi i Kurtit, në kundërshtim me interesat e Kosovës

Me rastin e arrestimit të liderit të Lëvizjes “Vetëvendosje”, Këshilli Kundër Procesit Gjyqësor ndaj Albin Kurtit rithekson se tërë procesi gjyqësor ndaj Kurtit është një proces absurd që është në kundërshtim me interesat e Kosovës dhe të gjithë qytetarëve të saj për një shtet demokratik ku sundon ligji dhe respektohen të drejtat e njeriut.
Këshilli kërkon nga Prokurori i rastit që duke e dëgjuar zërin e afro 150.000 qytetarëve të Kosovës dhe 175.000 qytetarëve nga të gjitha trevat shqiptare t’i tërheqë akuzat ndaj Kurtit dhe të ndikojë që ky rast të mbyllet urgjentisht.

Njëkohësisht Këshilli kërkon nga institucionet e drejtësisë dhe ato qeveritare të Kosovës, që në vend se të merren me procesin gjyqësor ndaj Albin Kurtit, të kërkojnë llogari nga UNMIK-u për vrasjet e Arben Xheladinit dhe Mon Balajt dhe plagosjen e 80 qytetarëve më 10 shkurt të vitit 2007, dhe këtë presion, sipas këtij këshilli, Institucionet e Kosovës, do të duhej që përmes kanaleve zyrtare ta zhvendosin edhe në OKB, BE dhe KE.