Serbia në kundërshtim me vetveten

Pala serbe është tërhequr në elemente të ndryshme të
projekt-marrëveshjeve. Madje, ka pasur raste edhe kur për propozimet e
veta ka rënë në kundërshtim me vetveten.Në një intervistë
për Evropën e Lirë, kryenegociatorja dhe zëvendëskryeministrja, Edita
Tahiri ka thënë se marrëveshjet e mundshme do të jenë në formë të
standardeve evropiane, që do t’i obligojnë të dyja palët.
Lidhur me kritikat që kryetari i Kuvendit, Jakup Krasniqi ka bërë në
drejtim të platformës së bisedimeve, Tahiri ka thënë se Qeveria i ka
kryer të gjitha obligimet ndaj Kuvendit.
“Në takimet që i kemi pasur përmes video-konferencës, pala serbe ka
bërë tërheqje në elemente të ndryshme të këtyre projekt-marrëveshjeve.
Madje, ka pasur raste që edhe për propozimet që i ka dhënë vetë, ka rënë
në kundërshtim me vetveten dhe është tërhequr”, ka thënë Tahiri.
Zëvendëskryeministrja ka shtuar se pala e Kosovës ka shprehur
mirëkuptim për atë që ata kanë nevojë për t’i studiuar tutje vendimet e
tyre.
“Mirëpo, po ashtu kam kërkuar që të nxitojnë në vendimmarrje, sepse
është në interes të mbarëvajtjes së dialogut që të kemi vendime ashtu
siç ne, pala e Kosovës, për këto draft-marrëveshje të cilat janë në
tavolinë, kemi dhënë pajtimin në parim, kemi marrë vendime dhe mbetemi
seriozë në angazhimet tona për të çuar përpara dialogun dhe për të pasur
zgjidhje në të mirë të qytetarëve”, ka thënë Tahiri. /Telegrafi/