Ataku sistematik ndaj identitetit, në kundërshtim me konventat

Zëvendëskryeministrja e Kosovës, Edita Tahiri, në vazhdën e
përgatitjeve për raundin e katër të bisedimeve teknike në mesë të
Kosovës dhe Serbisë, ka pritur ekspertin e trashëgimisë kulturore nga
Universiteti amerikan i Harvardit, Andras Riedlmayer, si dhe Edi
Shukriun, kryetare e Këshillit të Kosovës për Trashëgimi Kulturore.Temë
qendrore e takimit ishte çështja dëmeve të luftës në fushën e
trashëgimisë kulturore në Kosovë. Me këtë rast, Tahiri falënderoi
ekspertin amerikan për kontributin e tij për Kosovën, i cili që nga viti
1999 ishte i angazhuar në Kosovë në çështjet e trashëgimisë kulturore.
Ajo vlerësoi se ataku sistematik ndaj identitetit dhe trashëgimisë
kulturore në kohë luftërash është në kundërshtim me konventat
ndërkombëtare dhe politikat e civilizimit global.
Riedlmayer njoftoi zëvendëskryeministren për studimet dhe gjetjet e
tij në fushën e dëmeve që i janë bërë trashëgimisë kulturore dhe fetare
gjatë periudhës së luftës, si dhe angazhimet për stabilizimin emergjent
të dëmeve dhe restaurimin e disa prej monumenteve të rëndësishme në
Kosovë.
Eksperti i Harvardit shprehu gatishmërinë për të dhënë këshillat dhe
eksperiencat e tij të pa rezerva në fushën e trashëgimisë kulturore. Në
fund, bashkëbiseduesit u pajtuan që edhe në të ardhmen të bashkëpunohet
dhe këto këshilla të vlefshme të shfrytëzohen për qëllim që të zbardhet
historia e luftës në Kosovë në fushën e trashëgimisë kulturore.
/Telegrafi/